118B, B.K.Paul

Wo ghar appna tha uss ghar k log apne the
Aaj lagta hai kya wo sub sapne the

"118B B K Paul" haan yahi hai uski pehchaan
Kabhi kabhi likh k dekh lete hain kahin bhoole to nahi ye pata
Khudd pe haste hain soochte hain kaise bhool sakte hain
Ye sirf ek pata nahi humare astitva ki pehchaan hai

Ghar ki uss manzil pe aab koi nahi rehta
Apni yaadein ek chote se kamre mein sajoon rakhe the
Uss kamre ki khidkiyon se ghanton kabootar dekha karte the
Pustak haath mein liye na jane kya soocha karte the

Barande pur rasoi thi humari jahan bartano ki
Aawajon k beech n jane kitni keetabein padhi ho
Rasoi se aati hui khooshboo aaj bhi yaad hai hume
Barande k pass seedhiyon se pitaji k kadamon ke awaaj aaj bhi yaad hain hume

Barande ke dushri aur bada kamra na jane kub se band hai
Haan wahi kamra hai jahan humne chalna,khelna,khana,padhna seekha
Haan wahi kamra hai jahan aaj bhi humari parchaiyaan rehti hain
Aaj bhi deewar pe wo ghadi teerchi hai jo humne gend se kabhi mari thi

Barande pe ek chauki(Takhta) hua karti thi aaj wo nahi hai wahan
Physics aur maths ke kai chapter uss chauki pe seekhe humne
Tukde tukde karwa diye papa ne, naye ghar mein uske liye koi jagah n thi
Un laakdiyon mein aaj bhi pencil se likhe humare naam hongen

Humara ye ghar ek gali mein tha
Un galioon mein mehkti apni ek duniya thi
Aaj bhi sapno mein wo gali dikhayi deti hai
Aaj bhi un galioon mein apne sapne dikhayi dete hain

Uss waqt Iccha hoti thi kahin door nikul jayen

Aaj icchaoon ne karwat li
Aaj uss purane ghar ki bahut yaad aarahi
Aaj phir wahan jane ki tamanna jaag uthi hai
AAj AC nahi table fan ki hawa khane ki iccha ho rahi hai
Aaj phir un kabootaroon ko dekhne ki iccha uthi munn mein
Aaj un purane pustako ko phir se padhne ki iccha jaag uthi hai
Uss rasoi ki kushboo n jane kahan chali gayi hai
Unn kadmon k aahat n jane abb kyun nahi sunayi dete hain
Deewar ki uss ghadi ko seedhi kurne ki iccha ho rahi hai
Aaj phir uss chauki pur apna naam likhne ka munn ho raha hai
Aaj phir un galiyoon se ek baar gujarne ki tamanna uthi.

JINDAGI

kisi shayar ne kaha jindagi ek sher hai
kisi ashiq ne kaha jindagi dilon ka khel hai
uss keeshan se poocho jindagi kya hai
unke liye baarish,anaaj,miti aur hul ka hona jindagi hai

kisi chaatr ne kaha jindagi ek imtihaan hai
kisi shikshak ne kaha jindagi hur prashn ka utter hai
uss majdoor se poocho jindagi kya hai
unke liye to pariwar ke liye chutt aur do waqt ka roti jutana jindagi hai

kisi mantri ne kaha jindagi ek kursi hai
kisi vevsayi ne kaha jindagi ek noton ki gaddi hai
uss seepahi se poocho jindagi kya hai
unke liye to hur pal maut ko dekh mushkurana jindagi hai

kisi sadhu,maulvi ne kaha jindagi kaashi,kaba hai
kisi dhaarmik ne kaha jindagi geeta,Quran hai
uss aanath se poocho jindagi kya hai
unke liye to pyar k do bol apne mata pita se ek baar sunn lena jindagi hai

subke liye alag alag maiene hain jindagi k
mere liye hur gum mein muskurana jindagi hai
hur haseen pal ka yaad aana jindagi hai
hur dushmun ko dost banana jindagi hai
mehkhane se bin piye laut aana jindagi hai
Pehla pyar doston k saath bakwas jindagi hai
aur subse mehetwapurn mera privar meri jindagi hai

PEHCHAAN

Aye kalum kya likhoon main aaj
Apno se door iss desh mein pardeshi hoon
jane kiske liye , apni parchayon se door hoon

Apni pehchaan apne logon mein na mili
Aur chala aaya iss pardesh mein pehchaan banane
Khud meri parchayan hasti hai mujh pe iss kadar
jaisa koi marial ghoda chala aaya ho ghodon ki race mein.

Khud hi anjaan hoon swayam se, Ya jaan ke anjaan bana baitha hoon
khud k bune resham ke dhaagon mein bandha hoon
ya makdi k jaale ko resham ka dhaga sumujh baitha hoon

Apne hi banaye raaston ko pehchaan nahi pa raha
ya bhrum mein kisi aur k banye raastoon pe chala ja raha hoon
Kahin khud ki talaash mein aage badhte badthe apno se door aagaya hoon
ya iss matlubi sumaaj mein itna matlabi hogaya hoon ki apno se dooriyan khud bana baitha hoon

Kabhi hasta hoon kabhi roota hoon
ek pal rukk, n jane kya soochta hoon
aagle hi pal chal padta hoon bina kisi utter ke intazaar ke
bus iss bheed mein Ziddi ki tarah aage badhe ja raha hoon

Kabhi n kabhi jaroor rukunga, iss jindagi se sawaal karoonga
kya pata peeche chode aaye kadmon ke nishaan mere
kisi rahgir ke kaam aaye, usko apni pehchaan mil jaaye
Bus ussi pal meri jeet hogi aur mujhe meri pehchaan mil jayegi